Pa los que lluchen, pa los persiguíos, pa los presos políticos.

Por Cándido y Morala, víctimes de la represión más xabaz. Por tolos que como Xosé Antón carecen les miseries d'esti apartheid (con mil perdones) y los sos actores. L'amenaza, el mieu: violencia y más violencia. Yo equí quedo llambiendo los barrotes hasta rompelos.

POEMA CON ÚRZULA

Llévame
a una tienda
d’animales,
llévame
a una cárcel,
furácame
con noxu
l’intestín,
que yo hasta
frañelos
voi llamber
los barrotes
que dan sombra
al respingu
de les xaules.

P.D. El poema ye anterior a los asocedíos que se nomen al entamu d'esta entrada.

Treslallende

Esti vienres, a les 8, Berto y yo presentamos Treslallende nel salón esi de La Nueva España. Nun hai espicha nin pinchéu nin siquier bébora: namás rollu y tal.

Insubmisión lhinguística darreo

Farté, cansé, rompí.

OENI: Oxetu Esnalador Non Identificáu
Cai ensin xida -> Pa "Cai ensin salida" / "Cai zarrada" / "Cai trancada"...
Torgao fumar -> Pa "Nun fumar" / "Prohibío fumar"
Albidru / Camientu -> Pa "Opinión"
...

Academia de la Llingua Asturiana (2007) Cartafueyos Normativos. Abreviatures, rotulaciones y propuestes d'espresión y llocución. Academia de la Llingua Asturiana. Uviéu.


Nun me da l'alma pa siguir con esta vuelta a 1980. Siéntolo, yo daquella tenía menos 3 años, igual ye por eso que nun soi a entendelo. De verdá que lo siento.

Sacao d'Asturies.com

Asturies.com (decanu de la prensa dixital n'asturianu, prestábame recordalo) vien de publicar esti testu carcavadiegu.

UNIDÁ (ATENCIÓN, CONTIÉN AUTOCRÍTICA)

Los 4119 votos (2 de cada 300) colos que la sociedá asturiana premió la candidatura d’Unidá son quiciabes un númberu perfeutu pal futuru del nacionalismu d’izquierda verde n’Asturies. El meyor de los resultaos posibles porque nun constitúi un fracasu que provoque una fuxida al ostracismu nin una victoria (nin real, nin ponderada, nin nel frou) que llene d’aire los estómados. Esos 4 millares pasaos de votos y los 4 conceyales que la rede de candidatures d’Unidá ganaron, asitien dientro de les previsiones de los más realistes, equidistantes ente quien prevía dalgo grande y quien prevía’l sapiazu definitivu. Y eso ye lo bono: un resultáu qu’obliga a siguir. Pero a siguir d’otra miente, otra miente bien estremada yá non del esfuerzu tan dignu como serondu del mes últimu, sinón de les dinámiques de comunicación cola sociedá y d’aición política de los últimos 30 años. Una estratexa que vien tando sistemáticamente enquivocada.

Pesie a los esfuerzos de Llope por espresase públicamente con dalgo más trabao como ye l’apueste por un cambiu multifactorial de modelu social, cultural y políticu n’Asturies, Unidá nun pudo facer otro qu’acabar apruciendo pa estes elecciones como’l ya cuasi prototípicu tayuelu de tres pates: Asturies, izquierda y ecoloxismu. Y asina tentó de vendelo, con un ciertu ensinsustancialismu que nun tardó n’entrar en confusión, pa muncha xente, colos mensaxes ensinsustancialistes que mesmo llanzaba Izquierda Unida, mentanto ésta, comento de raspión, diba perdiendo otru cachu más de madera nel fundimientu, ensin que quede yá más naide dispuesto a tira-y otra tabla. Pero sí, el tracamundiu taba servíu hasta nel nome (Izquierda UNIDA, UNIÓN URAS-PAS... que nun quede UNIDAD Praviana...) y los que trabayamos na campaña nun podemos negalo: un alcuñu suicida polo mimético, por nun saber facer rebelgos na oreya de quien escucha.

Sicasí, Unidá llevó votos de la masa –o masina- de desencantos del pautu de 2003 ente Izquierda Unida y PSOE y seguramente garró dellos del PAS –que terminó metiéndose nuna cai trancada con Sergio Marqués, nun proyectu cada vegada más lloñe de too, incomprensible, bramente ranciu-. Los númberos canten. L’Andecha Astur que nun ta n’Unidá quedó con 2800 de los 3800 votos de la vez postrera, ye dicir, el sector mayoritariu qu’apostó pola unión de fuerces nun pudo o nun supo mover al so propiu electoráu que, clisáu pola marca y desinformáu –prieses, enguedeyu- apostó con variable nivel de consciencia (y dígolo en sentíu estrictu, ensin matiz valorativu) pol sector non unionista. Asina que llevamos 1000 votos pa Unidá... ¿y los 3000 y picu que queden? Pos habría que falar de les simpatíes d’IAS –nun sé cuántes nin en qué midida mudables en votos dao que nunca nun entrare(mos) n’elecciones d’esti calter-, de les simpatíes pol esfuerzu pola unidá, del castigu de la izquierda non entregada a la FSAcracia, del castigu verde al urbanismu xabaz y al deliriu enerxéticu...

Vamos siguir con númberos: 4119 d’Unidá y 2770 votos de l’Andecha Astur provisionalmente oficial sumen 7000 sufraxos nacionalistes... ¿Cuántos votos nacionalistes podría haber nel PAS? (hai quien asegura que los hai) ¿Cuántos na despensa asturianista d’IU, el Bloque? ¿Aceptamos barcu y dicimos qu’Asturies, a 2007, tien ensin xorrascar o potencialmente unos 10000 votos convencidamente nacionalistes? Bono, nun taría mal. Tampoco bien. ¿Podemos dicir qu’a los dos meses de nacencia’l proyectu d’unión nacionalista dende perspectiva verde y d’izquierda n’Asturies yá capitaliza’l 40% d’esi potencial? Ye aritmética. Bono, nun ta mal. Tampoco bien. Los númberos siguen siendo los meyores pal futuru, nesi mesmu puntu mediu que suel obligar a mover el culo. Esti nacionalismu que tuvo n’Unidá ta en toles reivindicaciones de la izquierda y l’asturianismu. Los llugares comunes, davezu murnios, son: l’ecoloxismu radical, la defensa de les llibertaes, la llucha contra la represión creciente, la defensa de lo público... pero caro, Asturies nun lo sabe.

Esti país nun conoz que “los del bable” militen en toes eses coses, quiciabes polo tímido d’esa participación, seguro nuna parte por dellos cortocircuitos na comunicación cola sociedá, seguro, n’otra, porque nin siquier eses militancies son tolo xeneralizaes, tresversales y fondes como pa caltriar con voz propio nelles.

Pero cuidáu, mal vamos si iguamos con capitalizar el 100% d’esi votu fácil. Un proyectu nacional d’izquierda tien que se plantiar dende yá llegar a llargu plazu a más d’esos 10000, y cierto ye que pa ello va ser preciso qu’esista una cohexón clara y mayoritaria nesi nucleu, pero l’oxetivu ye una Asturies con futuru, non l’autocomplacencia de lo qu’a la fin nun ye más qu’una entrada floxa n’El Molinón.

Nun hai escusa, por desgracia esti país cuenta los sos problemes con munchos díxitos. Por desgracia la política mayoritario ye corrupto, clientelar y foriato. Por desgracia los medios nun tan pol cambiu. Por desgracia la lexislación electoral ye inxusta. Por desgracia lleváis/amos 30 años faciendo ensin cobrar. Por desgracia, el qu’escribe estes llinies tien 24 años. Por desgracia hubo que raspiar el suelu col focicu. Toes eses desgracies y les que tas discurriendo son a la fin l’alimentu de dalgo necesario, rupturista. Imaxe, nome y formes d’organizase nuevos, idees peñeraes y llucha pola conquista d’unes mínimes canales d’información que nos saquen d’esta situación afogadiza, son necesidaes básiques a proporcionar dende güei.

Un non redondu a quien pretenda facer del nuesu enfotu’l so flotador d’emerxencia. Un non redondu a quien dende dientro ponga per delantre rocees, intereses personales, zunes o petites, grandonismu, falta d’análisis con cabeza fría o capacidá pa flexibilizar y deprender. Un sí al alto la lleva pa esti proyectu que ta acabante de nacer y pal que queremos lo meyor dende l’empiezu. Salú.

Volvemos bien lluego

Espero que vos preste la que tamos entamando. El nome del poemariu nuevu ye El fríu dientro. Hola. Ye cosa de díes...

La "izquierda" "plural" y carcelera

Más que nada y tal que me dan ascu y tal y nun m'apetez buscar agora xuegos de palabres. ¿Val? Venga...

De campaña

- IU y Andecha auténtica impúgnennos candidatures.
- En Corvera la Xunta Electoral róbanos el derechu a los espacios publicitarios y decide que-y regala al PSOE la nuesa data (fecha, sitiu y día) pal mitín.
- Tamién en Corvera USPC ponse nerviosa y Los Verdes-Grupu Picoletos engánchenlos desenganchándonos los carteles.
- N'Avilés ASIA ponnos propaganda nos nuestros sitios.
- El CSIC da un centímetru más a la muleta, y d'otra diz que pue haber hasta 50.000 votos extraparlamentarios (nun salen les cuentes, pero faigo de la supuesta tendencia estadística una fe sistemática y simplista).
- Duélenme les manes d'apiertar brides.
- Duélenme los güeyos d'esta pantalla.
- Feliz santu, Zarruquina. Gracies Pingarates.